J: Suuradda Al- Faatixah iyo tafsiirkeeda:
🎧 1.Waxaan Ku billaabi Magaca Alle ee naxariista guud iyo naxariista gaarka ah ba leh. 🎧 2. Ammaan idilkeed iyo mahadba waxaa leh Allaah, Rabbiga uunka oo idil. 🎧 3. Naxariistaha Naxariista guud iyo Naxariista gaar ahaaneedba. 🎧 4. Boqorka Maalinta abaal marinta (Qiyaamada) ee leh wax walba. 🎧 5. Adigoo Keliya (Allow) ayaan ku caabudaynaa, oo Adigoo Keliya ayaan ku weydiisanaynaa kaalmo. 🎧 6. Nagu hanuuni (oo nagu sug) Jidka Toosan. 🎧 7. Jidka kuwaad u Nicmaysay, ee aan aheyn 'jidka' kuwa cadho Alle qabeenka ah, iyo 'jidka' kuwa lunsan midna. [Suuradda Al-Faatixah:1-7].
Tafsiirka:
Waxaa loogu bixiyey Suuradda Al-Faatixah, waayo waxaa lagu billaabay Kitaabka Alle Suuraddani.
1. Magaca Alle ayaan ku billaabayaa akhrinta Qur'aanka, anigoo kaalmeysanaya Alle Weyne kor ahaaye oo barakaysan xusidda Magaciisa.
- "Allaah" Waa: Kan lagu caabudo xaq, mana lagu magacaabo magacaa midaan Isaga aheyn.
- "Ar-Raxmaan" waa:  leh Naxariista Ballaaran, Naxariistaasoo gaadha oo deeqda wax iyo cid walba.
- "Ar-Raxiim" waa: U Naxariis Badan mu'miniinta.
2- "i Waa ammaan iyo mahad oo dhan waxaa leh Alle oo keliya.
3. "Ar-Raxmaani Raxiim": Waa: Ee leh Naxariista Ballaadhan Naxariistaasoo deeqda wax walba, U Naxariista Badan mu'miniinta.
4. Waa Maalinta Qiyaamada.
5 Macnaha waa: Waxaan ku caabudi Adigoo Keliya oo ku kaalmeysan Adiga Keligaa.
6. Waa ku hanuunidda Islaamka iyo Sunnada.
7. Macnaha waa Nagu toosi jidka addoomaha Alle ee wanaagsan ay ka mid yihiin Anbiyada iyo kuwa raaca, oo aan aheyn jidka Nasaarada iyo Yuhuudda iyo cid kasta oo aan Alle rumeyn.
- Waxaa sunne ah inuu qofku yidhaahdo akhrinteeda kaddib: (Aamiin) macnaha: waa Allow naga aqbal.

J: Suuradda Az-Zalzalah iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Marka dhulka la gilgilo gilgilashadeeda daran (Qiyaamada). 🎧 2. Oo arladu soo saarto culeysyadeeda (wixii ku aasnaa), 🎧 3. Aadmiguna yidhaahdo: Maxaa ku dhacay? 🎧 4. Maalintaas waxay ka warrami wararkeeda. 🎧 5. Inuu Rabbigaa u waxyooday darteed. 🎧 6. Maalintaas dadku wuxuu u soo dareeri si kala firdhisan si loo tuso (jasaha) acmaashooda (camalkii ay shaqeysteen dunida dusheeda). 🎧 7. Ee qofkii fala camal san oo le’eg saxar wuu arki. 🎧 8. Qofkii fala camal xun oo le’eg saxar wuu arki. [Suuradda Az-Zalzalah: 1-8].
Tafsiirka:
1.Marka arlada la gilgilo gilgilashadeeda daran (Qiyaamada). Marka la gilgilo dhulka gilgilid daran oo ku dhacaya Maalinta Qiyaamaha.
2. Oo ay soo saarto arlada (dhulku) waxa ku jira uurkeeda oo leh kuwo dhintey iyo wax ka duwan.
3. Oo yidhaahdo qofku isagoo yaabban: Maxaa ku dhacay dhulkii oo la dhaq dhaqaaqeysaa oo la gilgilan?!
4. Maalintaas weyn waxay arladu ka warrami waxa lagu sameeyey dusheeda oo kheyr iyo sharba leh.
5. Waayo Alle baa ogeysiiyey oo ku amray arrinkan.
6. Maalintaa weyn ay gariireyso dhulku waxay iman dadku goobta xisaabta iyagoo cabsi ka buuxdo oo ururro ah; si ay u arkaan acmaashoodii ay ku faleen adduunka.
7. Qofkii fala wax saxar le'eg ama quraanjo yar oo kheyr iyo samo ah wuxuu ka arki hortiisa.
8. Qofkiise falaa wax le'eg miizaan ahaan wax aad u yar oo falal xun ah wuxuu ka arki hortiisa.

J: Suuradda Al-Caadiyaat iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba iska leh.
🎧 1. Wuxuu ku dhaartay Alle fardaha orodka dheereeya iyagoo hiinraagi (fardaha dagaalka, iwm). 🎧 2. Iyo fardaha kiciya dhimbilaha dabka markay qoobkooda dhagaxa la dhacayaan xilliga ay weerarka ku yihiin cadowga. 🎧 3. Iyo fardaha cadowga weerara subaxa hore, 🎧 4. Markaas boorka kiciya, 🎧 5. fardaha badhtanka u gala guutooyinka cadowga marka dagaalka lagula jiro cadowga. 🎧 6. Aadmigu waa ka abaal dhacaa Rabbigi (Allaah) kuna keni adag yahay. 🎧 7. Isagaana taasi ka markhaati ah. 🎧 8. Oo waa ku daran yahay Jaceylka maalka. 🎧 9. Ma wuusan ogeyn marka waxa ku jira qabuuraha la soo bixiyo. 🎧 10. Waxa ku jirana laabaha la caddeeyo(bannaanka la keeno). 🎧 11. Hubaal Rabbigood maalintaas waa u Xog-Ogaal (arrimahooda oo dhan). [Suuradda Al-Caadiyaat: 1-11].
Tafsiirka:
1. Alle wuxuu ku dhaartay fardaha orda ee laga maqlo hiinraagga xoogga leh orod badni darteed.
2. Alle Wuxuu kaloo ku dhaartay fardaha ku shida qoobabkooda dab sida madagta oo kale uga dhalanaaya ciddida ku dhacaysa dhagaxa darteed.
3. Wuxuu kaloo ku dhaartay fardaha ku duula cadowga waaberiga.
4. Kuwaasoo kicinaaya siigo xawliga ay ku socdaan dartii.
5. Ee cadowga badhtamaha u gala iyagoo raggu saaran yahay fardahaa.
6. Aadmigu waa mid diida kheyrka Rabbigii uu ka rabo.
7. kheyr diid nimadiisana marag buu ka yahay, ma inkiri karo waayo wey iska caddahay.
8. Jaceyl dartii uu u qabo maalka ayuu ka bakheylaa bixintiisa.
9. Miyuusan ogeyn qofkan ku kadsoon noloshan adduunka hadduu Alle soo saaro waxa ku jira qubuuraha oo kuwii dhintay ah oo ka soo bixiyo dhulka si loo xisaabiyo oo loo abaal mariyo in arrinku aheyn sidii uu moodayey?!
10. Oo la soo bixiyo oo muujiyo waxa ku jira laabaha ee ah niyooyin iyo caqiidooyin iyo wax ka duwanba.
11. Rabbigood baa maalinkaa u xog ogaal ah, kama qarsoona wax ka mid ah arrinka addoomahiisa wuuna ka jaasayn (abaal marin).

J: Suuradda Al-Qaaricah iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Garaacdada (qalbiyada waa Qiyaamada). 🎧 2. Maxay tahay qaarica?. 🎧 3. Maxaa ku ogeysiiyey waxay tahay qaarica? 🎧 4. Waa Maalintay dadku noqon sida balan baalis kala firidhay. 🎧 5. Oo buuruhu noqon sida cudbi la filqay. 🎧 6. Qofka miisaankiisu (camallada wanaagsan) uu cuslaado. 🎧 7. Wuxuu ku noolaan nolol barwaaqo iyo farxad leh oo raalli lagu yahay (Janno). 🎧 8. Qofkase uu miisaankiisu (camallada wanaagsan) fududaado (yaraado). 🎧 9. Hoygiisu waa Haawiya. 🎧 10. Maxaa ku ogeysiiyeyna waxay tahay haawiya? 🎧 11. (Waa) Naar kulul oo holcaysa. [Suuradda Al-Qaaricah: 1-11].
Tafsiirka:
1. Saacdda garaacaysa quluubta dadka darraanta/waynida dhibaatadeeda darteed.
2. Waa maxay Saacadda Qiyaame ee garaaceysa quluubta dadka weynaanta shiddadeeda (dhibteeda) darteed.?
3. Oo maxaa ku ogeysiiyey Rasuul Alloow maxay tahay Saacaddan Qiyaame ee garaaceysa quluubta dadka weynaanta shiddadeeda?! Waa Maalinta Qiyaamaha.
4. Maalintay garaacdo quluubtu dadka waxay noqon sida balan baalis kala firidhay halkan iyo halkaas.
5. Buuruhuna ay noqon sida cudbi la dhilay/filqay oo fududaan socodkooda iyo xarakadooda.
6. Qofkii uu ka miisaan cuslaado camalkiisa wanaagsani kiisa xun.
7. Kaasi isagu wuxuu ku noolaan nolol uu ka raalli yahay oo ku helayo Jannada.
8. Qofkiise uu ka cuslaado camal kiisa xuni kiisa wanaagsan.
9. Hoygiisu iyo rugtiisa Maalinta Qiyaamaha waa Jahannama.
10. Maxaa ku ogeysiiyey Rasuul Allow waxay tahay?!
11. Waa naar kulayl badan.

J: Suuradda At-Takaathur iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Waxaa idin shuqliya/mashquuliyey (dadow) wax badso (iyo isu faanid). 🎧 2. Ilaa aad siyaarataan qubuuraha (macnaha dhimataan oo la idinku aaso). 🎧 3. Mayee, waad ogaan doontaan. 🎧 4. Misna, mayee, Waad ogaan doontaan. 🎧 5. Mayee, haddaad ogaan lahaydeen ogaansho dhab ah. 🎧 6. Waxaad hubaal arki Naarta ololka badan ee Jaxiima. 🎧 7. Markaas waxaad u arki doontaan si yaqiin ah (aragti run ah oy idiin muuqato). 🎧 Waxaa Maalintaa la idin weydiin Nicmooyinkii (Alle idinku galladeystay8). (Suuradda At-Takaathur: 1-8).
Tafsiirka:
1. Waxaa idin shuqliyey (howlay, ku howshan tihiin) -dadow - isugu faanid iyo ku tartan maal badsi iyo awlaad halkii cibaadada Alle.
2. ilaa aad dhimataan oo aad gashaan qabuurihiina.
3. Ma aheyn inaad ku mashquushaan isu faan iyo kala badsi maal iyo awlaad oo ay idinka shuqliyaan cibaadada Alle, waadna ogaan doontaan cidhibta arrinkaasi.
4. Oo waad ogaan doontaan cidhib dambeedka arrinkan.
5. Xaqiiq, haddaad ogaan laheyden si yaqiin ah in Alle qubuuraha idin ka soo saari, iyo inuu idinka abaal marin acmaashiinna iskuma shuqliseen isugu faanka maalka iyo awlaadda.
6. Wallee waad arkeysaan Naarta Maalinta Qiyaamaha.
7. Oo waad arkeysaan arkid muuqata oo aan shaki ku jirin.
8.Waxaana Maalintaa la idin weydiin Nicmooyinkii (Alle idinku galladeystay). Markaas wuxuu Alle idin weydiin Maalintaa waxa uu idinku galladeystay oo leh caafimaad iyo deeq iyo wixii ka duwan.

J- Suuradda Al-Casar iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Waxaan ku dhaartay waqtiga. 🎧 2. Aadmigu wuxuu ku sugan yahay khasaare dhab ah. 🎧 Kuwa (Xaqa) rumeeyey mooyee oo samaha fala, oo isu dar-daarma Xaqa (iyo caddaalad falka), isuna dar-daarma samirka (iyo sugnaanta). [Suuradda Al-Casar: 1-3].
Tafsiirka:
1. wuxuu Alle ku dhaartay waqtiga.
Innal insaana lafii khusr2": 2. Aadmiga oo dhan waxay ku sugan yihin hoog iyo halaag.
3. Ilaa midka xaqa rumeeyey oo sama fala oo ugu yeedha dadka xaqa oo ku samra, kuwaa weeyaan kuwa ka badbaadi khasaarada.

J: Suuradda Al-Humazah iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Hoog waxaa leh dure kasta (xumaan ku tilmaame dadka), oo wax xanta. 🎧 2. Kaasoo maal ururiya oo tiriya oo u heysta sahay ahaan (aanse ka bixin xaqa lagu leeyahay: sakada, iwm); 🎧 3. Wuxuu moodaa in maalkiisu waarin. 🎧 4. Mayee, waxaa lagu tuuri burburisada. 🎧 5. Maxaa ku ogeysiiyey waxay burburisadu tahay? 🎧 6. Waa Naarta Alle ee holcaysa. 🎧 7. Ee kor ugu baxda quluubta dushooda (iyadoo gubeysa), 🎧 8. Waxaa lagaga xidhi dusha (gaalada). 🎧 9. Tiirar la taagay dhexdood. [Suuradda Al-Humasa: 1-9].
Tafsiirka:
1. Ba' iyo hoog iyo cadaab daran wuxuu u sugnaaday qofka dadka xanta oo dura.
2. Kaasoo hammigiisu yahay maal urursi iyo tirinti, aan hammi kale laheyn.
3. Wuxuu moodaa in maalkiisu uu kulmiyey ka badbaadin geerida oo ku waari nolosha adduunka.
4. Arrinku ma aha sida uu moodayo jaahilkan, waxaa lagu tuuri Naarta Jahannama ee garaacda oo jajabisa wixii lagu tuuro baaskeeda daran awgi.
5. Maxaa ku ogeysiiyey Rasuul Allow maxay tahay Naartan burburin wax kastoo lagu tuuro?!
6. Waa Naarta Alle ee holcaysa.
7. Ee ku fidda jidhadhka dadka oo gaadha quluubtooda.
8. Waa mid kuwa lagu cadaabi looga xidhi dusha.
9. Tiirar fidsan oo dhaa-dheer si aanay uga bixin (kamaba bixi karaane).

J. Suuradda Al-Fiil iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Mawaadan ogaan sida Rabbigaa u galay qoladii maroodiga wadatey? 🎧 2. Sow kama uu dhigin dhagartoodii wax dhumay (ku dhammaaday jab iyo jah wareer), 🎧 3.Oo u soo dirin kuna sallidin shimbiro guutoooyin ah, 🎧 4. Kuwaasoo ku soo ganaya (tuureysa) dhagaxyo dhoobo naareed ah, 🎧 5. Oo ka yeelay sidii bal la daaqay? [Suuradda Al-Fiil: 1-5].
Tafsiirka:
1. Rasuul Allow - miyaanad ogeyn sida Rabbigaa u galay Abraha iyo asxaabtiisii kuwii watey maroodiga markay dooneen inay dumiyaan Kacbada?!
2. Wuxuu ka yeelay Alle qorshahoodii xumaa ee ahaa iney dumiyaan Kacbada mid ku dhammaaday guul darro, ma ayan helin waxay doonayeen ee ahaa inay dadka ka jeediyaan Kacbada, waxbana kama helin faa'iido waxay u socdeen.
3. Wuxuu ku diray shimbiro ugu yimid kooxo kooxo.
4. Shimbirahaasi oo ku tuuraya dhagax ka samaysan dhoobo dhagaxawday oo dab oo kale ah aad u kulul.
5. Markaasuu wuxuu Alle ka yeelay sida bal la daaqay (cows xoolo cuneen oo ku dul socdeen).

J: Suuradda Quraysh iyo fasirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Caadeysigii Quraysheed. 🎧 2. Ay ka caado yeesheen safarka jiilaalka iyo xagaaga (si nabad ah ganacsiga). 🎧 3. Ee ha caabudeen (Alle Keliya) Rabbiga Baytkan (Kacbada Makkah ku taal). 🎧 4. Kaa soo ka quudiyey gaajo, kana aamin yeelay cabsi. [Suuradda Quraysh: 1-4].
Tafsiirka:
1. Waxaa loola jeedaa caadeysigoodii safarkii ganacsiga ay u aadi jireen waqtiga jiilaalka iyo xagaayada.
2. Safarkoodii jiilaalka ay u aadi jireen Yaman iyo safarkoodii xagaaga dhanka Shaam iyagoon waxba ka cabsaneyn oo aamin iyo nabad ah.
3. Ee ha caabudeen Allaah Rabbiga Beytka Xaramka ee Kacbada ee u fududeeyey safarkan, oo yeyna cidna la wadaajin cibaadada.
4. Ee ah Kan ka quudiyey gaajo oo ka nabad geliyey cabsi. Isagoo galiyey quluubta Carabta weyneynta Xaramka, iyo weyneyn dadka ag deggan Xaramka.

J- Suuradda Al-Maacuun iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Ka warran kan beeniyey is abaal marinta (Aakhiro). 🎧 2. Kaasi waa ka ula dhaqma agoonta si qallafsan. 🎧 3. Oo aan ku dhiirri gelin (dadka) quudinta masaakiinta. 🎧 4. Waxaa hoog leh kuwaa tukada (munaafiqiinta ah), 🎧 5. Ee ka dhoohan salaaddooda (ka dib dhiga waqtiyadooda). 🎧 6. Kuwaasoo u fala (samaha) si loo arko. 🎧 7. Una diida (dadka) maacuunta (waxyaalaha yar yar ee laysugu kaalmeeyo, sako iyo sadaqo iyaga warkoodba daaye). (Suuradda Al-Maacuun: 1-7).
Tafsiirka:
1. Ma garatay kan beeniya is abaal marinta Maalinta Qiyaamaha?!
2. Kaasi waa kan u riixa agoonta si daran oo aan xaqiisa siin.
3. Aan ku boorrin naftiisa, iyo qeyrkiba quudinta miskiinka.
4. Ba' iyo hoog iyo cadaab waxaa leh kuwa tukada ee munaafiqiinta ah.
5. Ee ah kuwa salaaddooda ka dhoohan, aan dan u gelin ilaa waqtigeeda baxo.
6. Kuwa salaaddooda istuska tahay iyo acmaashoodaba (waxay sameyn ee cibaado ah) oo aan u gaar iyo gooni yeelin camalkooda Alle Weyne kor ahaaye.
7. Oo diida inay ku kaalmeeyaan dadka waxaan dhib ku jirin in loogu kaalmeeyo.

J- Suuradda Al-Kowthar iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Waxaannu ku siinnay (Nabi yahaw) Al-Kawthar (webi Jannada ku yaal iyo khayr tiro badan). 🎧 2. Ee u tuko Rabbigaa Dartiis, oo u gowrac xoolo (adigoo Isaga Keliya Magaciisa ku xusi, uguna dhowaan. 🎧 3. Hubaal nacabkaagu waa kan cidhib go’i. [Suuradda Al-Kowsar: 1-3].
Tafsiirka:
1. Waxaan ku siinnay Rasuul Allow kheyr tiro badan, uu ka mid yahay webiga Kowsar ee Jannada dhex mara.
2. Ee uga mahdi Alle nicmaddan inaad u tukato darti keliya oo wax u gowracdo keligi, si khilaafsan waxay mushrikiinta falaan oo ah inay ugu dhowaadaan gowracooda sanamadooda.
3. Hubaal nacabkaaga waa kan cidhib go’i. Nacabkaaga waa kan uu ka go'i khayr oo dhan ee la hilmaami haddii la xusona lagu xusi xumaan.

J- Suuradda Al-Kaafiruun iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Dheh: Gaalooy. 🎧 2. Anigu ma caabudayo waxaad caabudeysaan, 🎧 3. Idinkuna ma caabuddaan Kaan Anigu caabudo (Allaah Keliya). 🎧 4. Aniguna ma caabudayo waxaad idinku caabudeysaan (oo ilaahyo been ah). 🎧 5. Idinkuna ma caabuddaan Kaan anigu caabudo (Alle Weyne kor ahaaye). 🎧 6. Waxaad leedihiin diintiinna iyo camalkiinna, aniguna waxaa leeyahay diinteyda iyo camalkeyga, oo bari ayaan idin ka ahay. [Suuradda Al-Kaafiruun : 1-6].
Tafsiirka:
1. Dheh- Rasuul Alloow-kuwiinan Alle ka gaaloobayoow.
2. Ma caabudayo mana caabudi doono waqtiga soo socda waxaad caabuddaan oo sanamyo ah.
3. Mana ahidin kuwo caabuda midkaan anigu caabudayo oo ah Alle Keligii.
4. Ma caabudayo anigu waxaad caabuddaan oo sanamyo ah.
5. Mana ahidin kuwo caabudaya midka aan anigu caabudo oo ah Alle Keligii.
6. Waxaad leedihiin diintiinna aad been abuurateen iyo hab dhaqankiinna gurracan, aniguna waxaan leeyahay diinteyda uu Alle igu soo dejiyey.

J- Suuradda An-Nasar iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Markuu yimaado Gargaarka Alle iyo guusha (Furashada Makkah). 🎧 2. Oo aad aragto dadka oo u soo galaya diinta Alle (Islaamka) rac-rac (kooxo), 🎧 3. Markaas ku tasbiixso Ammaanaha Rabbigaa, weydiisona Denbi Dhaaf. Hubaal Alle waa Toobad aqbal Badane. [Suuradda An-Nasri: 1- 3].
Tafsiirka:
1. Hadduu yimaado u gargaarka Alle ee diintaada - Rasuul Alloow oo dhacdo Furashada Makkah.
2. "Wa ra-aytan naasa yadkhuluuna fii diinil laahi afwajan 2": Oo aad aragto dadka oo soo galaya Islaamka wafdi wafdi (ururo kooxo ah oo is daba socda).
3. Ogow inay taasi tahay calaamad muujin soo dhowaanshaha dhammaadka howsha laguu soo diray iyo ajashaada, ee ku tasbiixso xamdiga Rabbigaa, adigoo ka mahad naqi nicmadda guusha Alle ku siiyey iyo Furashada Makkah, kana weydiiso denbi dhaaf, waayo waa Toobad aqbalaha, aqbala toobada addoomahiisa oo u denbi dhaafa.

J- Suuradda Al-Masad iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Ha hoogeen gacmaha Abuu lahab wuuba hoogee 🎧 2. Maalkiisa iyo waxa uu kasbaday ee wiilashiisuna ka mid yihiin mid koodna wax uga tarimaayo aakhiro iyo cadaabkeeda. 🎧 3. Wuxuu geli doonaa Naar olol badan. 🎧 4. Iyo marwadiisuba, xaabo siddada ah, (xanta iyo xinta iyo dirdirada badan), 🎧 5. Qoorteeda waxaa la yeeli xadhig adag xaskul la soohay (oo Naar ah). [Suuradda Al-Masad: 1-5].
Tafsiirka:
1. Waxaa hoogay oo khasaaray labada gacmood ee adeerka Nabiga sallallaahu calayhi wasallam, Abuu Lahab bin Cabdul Muddalib khasaarada camalkiisa darti, waayo wuxuu dhibi jirey Nabiga s.c.w hoog oo ba'a dadaalkiisi ahaa hor joogsiga diinta.
2. Maxay u tareen maalkiisa iyo ilmahiisa? Kama ay celin cadaab, umana keenin naxariis.
3. Wuxuu geli Maalinta Qiyaamaha Naar olol badan, oo ku dhibtoon kuleylkeeda.
4. Waxaa sidoo kale geli Naarta xaaskiisa Um Jamiil ee dhibi jirtay Nabiga s.c.w. iyadoo dhigi jirtay qodxo jidkiisa (Nabiga csw).
5. Qoorteeda waxaa ahaan xadhig adag oo la soohay oo loogu hoggaamin Naarta.

J- Suuradda Al-Ikhlaas iyo tafsiirkeeda:
🎧 Waxaan Ku billaabi Magaca Alle ee Naxariista guud iyo midda gaar ahaaneedba Naxariista.
🎧 1. Dheh: Allaah waa Mid Keliya (Axad ah aan wax shariig ah lahayn). 🎧 2. Allaah waa Sayidka Deeqtoon (ma baahdaha loo wada baahan yahay). 🎧 3. Ma dhalin (ma leh ilmo), lamana dhalin (ma leh waalid - aabbe iyo hooyo - iyo xaas midna). 🎧 1. Ma jiro axad u dhigma (Alle oo la mid ah ama la barbar dhigo). [Suuradda Al-Ikhlaas: 1-4].
Tafsiirka:
1. Dheh - Rasuul Allow - waa Allaah uusan jirin ilaah xaq ah oo aan Isaga aheyn, waa mid keliya.
2. Isagu waa Kan ay u sheegtaan baahidooda uunka oo dhan.
3. Ma leh ilmo Isagaa xumaan ka hufane mana laha waalid midna.
4. Mana jiro cid la mid ah ama u dhiganta oo uunkiisa ka mid ah.

J: Suuradda Al-Falaq iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba naxariista.
🎧 1. Dheh: Waxaan ka magan galay Rabbiga oogga (dillaacsha, waa Alle'e), 🎧 2. Waxaan ka magan galay sharka wuxuu abuuray; 🎧 3. Iyo sharka habeenka mugdiga badan markuu mugdigiisa daboolo (samada iyo dhulka dhexdooda). 🎧 4. Iyo sharka kuwa wax ku tufa guntimaha (saaxirooyinka iyo sixiroolayaasha). 🎧 5. Iyo sharka xaasidka markuu wax xasdo. [Suuradda Al-Falaq: 1-5].
Tafsiirka:
1. -Nabiyow- dheh waxaan u noqon xagiisa oo isku tiirin Rabbiga subaxa oo magan geli.
2. Ka magan geli sharka wixii dhib leh oo ka mid ah uumankiisa.
3. Waxaan qabsan oo ka magan geli Alle shararka soo baxa habeenkii ee nafley dhul ku socod ah iyo tuugo.
4. Waxaan kaloo ka magan geli sharka saaxirooyinka wax ku afuufa guntimaha.
5. Iyo sharka xaasidka neceb dadka hadduu ku xasdo waxa uu Alle siiyey oo Nicmooyin ah, isagoo jecel iney waayaan oo ka baabba'do oo dhib soo gaaro.

J- Suuradda An-Naas iyo tafsiirkeeda:
🎧 Magaca Alle ayaan ku billaabayaa, Allaha naxariista guud iyo midda gaar ahaaneedba Naxariista.
🎧 1. Dheh: Waxaan magan galay Rabbiga dadka. 🎧 2. Boqorka dadka. 🎧 3. Ilaaha dadka. 🎧 4. Waxaan ka magan galey sharka waswaasiyaha (sheydaanka) soo noqnoqodka badan. 🎧 5. Kaasoo waswaasiya laabaha dadka. 6. (Shaydaankaa) oo jin iyo dadba leh.
eh. [Suuradda An-Naas: 1-6].
Tafsiirka:
1. Dheh - Nabiyow- waxaan isku tiirin Rabbiga dadka, oo magan geli.
2. Kaasoo ah boqorka dadka ee leh kana yeela siduu doono, ma jiro mid iska leh oo aan Isaga aheyn.
3. Alle ee ah midka Keliya ay xaqa ku caabudaan, ma jiro la caabude xaq ah oo aan Alle aheyn.
4. Sharka sheydaanka ku tuura waswaaska dadka.
5. Kaasoo ku tuura waswaas galiyana laabaha dadka.
6. Waswaasiyahaa oo dad iyo jinba leh.
*******